تحدث إمام عاشور، نجم النادي الأهلي، مساء اليوم الخميس، عن مشادته مع فرد الأمن، أثناء مراسم تتويج الأهلي بلقب الدوري المصري الممتاز.

وتمكن الأهلي من التتويج ببطولة الدوري المصري الممتاز، بعد الانتصار على فاركو بسداسية في المباراة التي جمعتهما على ستاد «القاهرة الدولي»، وذلك ضمن منافسات الجولة الختامية من مرحلة التتويج بالدوري.

وقال إمام عاشور في برنامج «الكورة مع فايق» المذاع على شاشة «إم بي سي مصر»: «أهلي كانوا في المقصورة وبنتي كانت موجودة، وكنت عايز أجيبها، وفرد الأمن منعني اتكلمت معاهم باحترام في الأول، وقولتلهم مش عايز أنزل والدي ولا مراتي، انا عايز بنتي بس، وقالولي مش هينفع».

وأضاف: «لقيت بعدها حد من اللعيبة واخد ولاده، فقولتلهم كذا واخد ولاده قالولي مش هيطلع معاه التتويج، فقولت وانا كمان مش هطلع بنتي التتويج، وكانت اللقطة حصلت من الشناوي بردو، بس الناس صورتني أنا».

وتابع: «بقوله انت هتفضل موقفني كدة وبنتي معايا، وكاتليا لما شافتني بتكلم بزعيق عيطت، وبعدين شديت البوابة، وقولتلهم انتوا إزاي تعاملوني كدة، وليه مش عايزين تدخلوا طفله متعرفش حاجة، وكنت عايزها تشاركني اللحظة السعيدة دي».

واختتم: «اتكلمت بعد الاحتفال مع فرد الأمن ورضيته، واتصورنا مع بعض في أوضة اللبس، وخد التيشيرت بتاعي، ومفيش أي حاجة».